Et is nog gien karst…
Een echte Urker eutspraak die we dink ik allemaol wel kinnen. Mar et is een eutspraak waor we nooit an mugen winnen. Wat wort er eagelijk mie bedoeld, wat is de beteakenis iervan? Ik wil namelik tugen disse eutspraak ingoon, dat is men plan. Disse woorden klinken as er an et eande van et jaor wier iets args is gebeurd. Ze klinken as de donkere dagen vor karst nog zwarter worren ekleurd.
Et is nog gien karst, wie wiet wat oens allemaol nog te wachten stot… Er kan van alles gebeuren, je wieten ommers niet oe et murgen got. Vor sommigen zal et vorbij evleugen wezen et ofgeloepen jaor. Vor een anger liek miskien alles wel stille te stoon, want et gemis kwam daor. Terogge kiekend voert vor de iene vooral dankbaoreid de boventoon. Vor de anger was miskien alles wel zurgelijk, et jaor is zo muuilijk egoon. Wat et ofgeloepen jaor ebrocht et, dat zal vor iederiene angers wezen. Iederiene zal daoromme ok dit stukkien dan mit zen eagen gedachtes lezen.
Mar wat we ok mit oens miedragen in oe we ok vandage in et leven stoon. Er is iets wat we mugen wieten, iets waor we niet an vorbij mugen goon. Ik oop namelijk dat et niet klopt, de eutspraak dat et nog gien karst eworren is.
Want as dat wel zo is, dan is er in je leven toch nog echt iets mis. Ik snap et wel wat er wort bedoeld in waor disse eutspraak vandeen komt.Mar zurg er toch vor dat het evangelie in je leven nooit verstomt.
Juust in teden dat et ier op aarde zo muuilijk in zo zwaor kan wezen. Mugen we vertrouwen die bo-skip die wij in de Biebel mugen lezen.
Jezus kwam vor oens nor de aarde toe in worde in een stalle ebeuren. Dit is toch die eerlike bo-skip die oens iele leven in mag kleuren. Et is al karst eworren in as et goed is et dat ok altosen eblieven. Want we mugen toch wieten dat et beloofde Keend al an oens is egieven. Wat ooit mit karst begonnen is in een ouwe stalle in die iene nacht. Is duur dat Jezus vor oenze zunden esturven is, op Golgotha volbrocht.
Ierduur mag ik wieten et beste moet nog koemen, ik kiek eut nor die dag. Waor ik eut genaode zelf mit eagen ogen meen Verlosser zien mag.
Dus zeg niet maar, et is nog gien karst… mar gelokkig eawen we karst…
Gezegende karstdagen…
Sjoerd bakker Jongerenpastor GKU.